By Lawrence Darmani
Rianaw: 2 Kings 19:9-20
Telifon (telephone), imel (email) te sel fon (mobile phone) 'ae um maw tuh cenaan ( telegram) hynh byathaekunaw hanlan aranghuaccepaw nynh athua. Thuaslamah azicipaw thongpang kyalya nynh kyyku athua, tuh e tuh thongpang thahpaw a lunghua. Tuhthuakeiccu "cenaan ccangvaepaw tuh thongpang thahpaw nynh leih oun phu" cite a ho 'ae.
Langmaw Isreal ram rhaw suh lya Hezekiah tuh Judah siangphahrang nynh athua. Assyria siangphahrang paw Sennecherib nynh Judah ram e khua 'ae khah dou zah, rhawtu zah pong taevae. Assyria siangphahrang paw Sennecherib nynh Hezekiah klan tuh ka sungvae cih lah zunghe kyng nangvae cite "cenaan" ccaw a ky. Hezekiah nynh "vawsaw nin, nyasah nin, maethyae nin" cite aho. (2 Kings 19:3)
Nuinsenaw te sareih sareih langte Sennacherib nynh a rhaw 'ae thongnaw kong, rhaw ataenaw kong kha poku bya aho. Israel 'ae Pachia kha pawlang ria leite a thahrya. (v11-13) Tuh e rilang umpaw, thongpang thahpaw keiccu siangphahrang paw Hezekiah nynh ciisahnaw ccankheih a rae. " Beikinn lang khe cceihzah Bawipaw malan tuh e thongpang thahpaw ccaw tuh ah phae." (14) Tuhkoute riilang umpaw ccyh kya tuin Bawipaw Pachia leesaenaw te thongnaw khah ny te ngaehoinaw te saw thaw te a sang. (v15-19) Tuin te tuh Pachia nynh Hezekiah khah a pang khae ( v35-36).
Thongpang thahpaw nynh aenin khah accyh po leite oun thuanaw kho. Tuh tahawpaw ccyh kya, Hezekiah ciisahnaw hynh ahooypaw tousenaw thuazah aenin nynh zui langpaw nynh athua. Thongpang thahpaw miakaw khah Bawipaw malan hopya te Bawipaw kya e byaa kingnaw khah thae thya aho. (v20)
Vawlae petu a Pang, ccungccaw 'ae nynh oun
dou vae 'ae ze bua leihru kae mang.
Kae maw te liarupaw langze Namaw klan
maeleihku khonaw lang oun ccangpah.
Namaw tuh kae zyng, kae sungsah.
Atunin kya Namaw nynh
oun thungkhaw.
OBD 3/5/16